الاثنين، 1 أكتوبر، 2012

بوفيه سلطات بيتزا هت

سلطه الكول سلو

بوفيه سلطات بيتزا هت من مطبخي

الطريقه كرنب مبشور او متقطع قطع صغيره +جزر مبشور
يضاف لهم الصوص وهو عباره عن
مايونيز + زبادي + خل + سكر + رشه ملح خفيفه قوي +شويه لبن صغيرين قوي



 - في طريقتين للكول سلو الطريقه الاولي بتبقي طريه شويه زي بتاعه كنتاكي تحسي كان الكرنب مسلوق لا هو مش مسلوق
هاقوللك علي السر
بتقطعي الكرنب طبعا صغير قوي علي قد ماتقدري
وترشي عليه السكر وذره ملح صغيره قوي
وتحطيه في مصفه
السكر والملح هايخلوا الكرنب ينزل الميه بتاعته
هاتستغربي من كميه الميه اللي نازله منه
وده بيخليه بعد كده يبقي طري ويشرب كويس من الصوص

الطريقه التانيه انك بتسيبي الكرنب زي ماهو وبيبقي مقرمش
ده بقي حسب زوقك انتي


2 - بالنسبه للصوص في ناس بتحط مايونيز بس
لكن انا بصراحه مش باحب ااكل معلقه مايونيز كامله كده في بقي
فباخفف المايونيز شويه بالزبادي مع شويه لبن حليب او لبن رايب
كده بيكون احلي واخف وكمان مش مكلف وخصوصا في العزومات باعمل منها كميات كبيره لانها اول حاجه بتتنسف


3-ممكن استبدال السكر بالعسل النحل بيدي طعم احلي

4- في حاجه اسمها باتر ميلك بتدي طعم احلي واحلي لو متوفره ممكن نضيفها او بدالها الكريمه اللباني او مش لازم خالص
بس كل دي حاجات بتدي طعم كريمي رائع


 الروس سالاد

بوفيه سلطات بيتزا هت من مطبخي

هي عباره عن خضار مشكل فاصوليا وجزر وبسله مسلوق
ويوضع عليه نفس الصوص بتاع الكول سلو


تكات:

1- انا باجيب كيس خضار بسمه مشكل بدل وجع القلب يا دوب بيتسلق في ميه وملح

2- لازم نطلع الخضار علي ميه ساقعه فيها تلج فورا علشان يحتفظ باللون الاخضر الجميل
وده عامه مع اي خضار اخضر





سلطه البطاطس بالمايونيز

بوفيه سلطات بيتزا هت من مطبخي

بطاطسايه مقطعه مكعبات ومسلوقه في ماء وملح
نضع عليها مايونيز +سكر+ خل + توم مفروم


تكات

1- السلطه دي طعمها بيبقي زي التوميه باظبط لان فيها توم ومايونيز وبتبقي جميله جدا جدا

2-لازم نقطع البطاطس قبل مانسلقها لان لو سلقناها صحيحه مش هانعرف نقطعها مكعبات وهاتتفرفت مننا

3- لازم البطاطس تكون سخنه يعني نصفيها من ميه السلق ونحط عليها علي طول المايونيز وباقي امكونات
علشان البطاطس وهي سخنه بتشرب اي حاجه تتحط عليها لكن لو بردت خلاص بتقفل المسام بتاعتها
وده بينطبق علي اي وصفه للبطاطس


4- ممكن نضيف بقدونس مفروم ونقلبه معاها وده حسب الزوق 




سلطه المايوتشب
هي عباره عن مايونيز +كاتشاب مخلوطين مع بعض وبيكون لونها بمبي فاتح


سلطه الطحينه

طحينه + زبادي + توم مفروم+ ملح وفلفل وبابريكا+ خل ولمون
يمكن التخفيف بالماء


تكات :


1- في ناس بتعمل سلطه الطحينه بالميه بس
لكن اضافه الزبادي بتخلي قوامها كريمي وطعمها جميل

2- لو لقينا قوامها تخين شويه بنخفف بالميه السخنه مش البارده لان الميه السخنه بتفتح لونها قوي 


 سلطه الفاصوليا الخضرا

فاصوليا خضرا مسلوقه توضع في ميه فيها تلج ثم تنشل ونقطع عليها بصل جوانح وفلفل الوان ونحط عليها سكر خل ملح زيت

سلطه الزبادي بالخيار

خيار مبشور +زبادي +نعناع ناشف +خل ولمون +سكر وملح


تكات :

1- الخيار لما بيكون مبشور من غير قشره بيبقي احسن

2- النعناع الناشف يفرك بالايد كويس قوي لحد مايبقي زي البودره
وهو مهم لاعطاء طعم رائع




سلطه الطماطم

كلنا عارفينها بس في حاجات بتخليها احلي
نخش عالتكات علي طول


تكات :

1- يفضل ان البصل يتنقع في خل وملح شويه قبل ماتعملي السلطه
لانه كده بيدبل شويه ومش بيحرق العين وانتي بتاكلي

2- الخيار لو قشرتيه هايفرق قوي في الطمع
انا زيك كده كنت مستهتره بالموضوع ده وعمري مافكرت اعمله وكنت باقول ايه الشيفات الهبله دي بيقشروا الخيار ليه
بس لما جربت عرفت الفرق ... انتي كمان لازم تعرفيه

3- الخس الكابوتشا افضل بكتير من الخس البلدي
ولكن يفضل تقطيعه عشوائيا باليد مش بالسكين لانه رقيق قوي وبينزل ميه علي طول

4- الصوص او الدريسنج مهم جدا
مش شويه خل وكمون واقلب
لا اعملي اي صوص كويس تحبيه
انا عامه باحب صوص المسترده
معلقه مسترده معلقتين زيت دره خل ملح سكر واضربيهم في الكبه هايبقي تقيل زي المايونيز بس تحححححححححححححححححححفه


 سلطه الحمص

حمص مسلوق كويس قوي يضرب في الكبه مع زيت وخل وملح وطحينه




التوميه

بوفيه سلطات بيتزا هت من مطبخي


3 علب زبادي+ 2 فصوص توم+ معلقتين مايونيز+ ملح و فلفل


نحط كل المقادير على بعض

نضربهم كلهم في الخلاط


تكات :


1- التوم لازم يكون مفروم من الاول علشان مايعملش كتل صغيره

2- مانضربش كتير في الخلاط علشان المايونيز مايفكش


 سلطه المكرونه

بوفيه سلطات بيتزا هت من مطبخي

غايه في الروعه اللي مايعرفهاش لازم يجربها

كيس مكرونه صغيره مسلوقه +علبة تونه +جزر+خيار+ذرة+فلفل رومي+2ملعقه كبيرة مايونيز
+2ملعقه كبيرة جبنه كوبايات بطعم الشيدر او اي طعم تحبوه
ملح+فلفل اسود

نخلط كل المكونات


تكات

1- المكرونه لازم تكون نوع كويس علشان ماتفرولش ولا تعجن
انا باحب ريجينا

2-التونه اي نوع بس ياريت تكون قطعه واحده مش مفتته علشان تبان

3- ممكن نستبدل التونه بقطع لانشون او بسطرمه او حتي سوسيس متحمر ومتقطع
كلهم بيبقوا احلي من بعض




سلطه البنجر

يقشر البنجر ويسلق ثم نضيف عليه ملح +فلفل+ زيت +سكر +خل 




تكات عامه لكل السلطات


1- السلطات كلها لازم تكون معموله قبلها بيوم او علي الاقل من الصبح
علشان تتشرب التتبيله كويس

2- الزبادي المستخدم في اي نوع سلطه لازم يبقي زبادي مبستر زي جهينه او اي ماركه تحبيها
عشان طعمه بيبقي كريمي
لكن الزبادي البلدي بيعمل حتت صغيره كده ومش بيدوب كويس

3-- المقادير بصراحه مش باعرفها لاني باعمل بالبركه كمان دي بتبقي متروكه لزوقك الشخصي
انتي مع الوقت هاتظبطي
ومهم قوي انك تدوقي بين كل خطوه والتانيه لحد ماتعرفي تظبطيها


4-اي حاجه مسلوقه زي البطاطس او البنجر او المكرونه او الحمص
لازم تتعمل علي طول وهي سخنه علشان تتشرب الطعم لكن لو سبتيها تبرد وبعدين حطيتي باقي المكونات مش هاتتشرب

ليست هناك تعليقات: