الخميس، 27 مارس، 2014

طريقة عمل لحم مفروم كذاب ( بدون لحم ) بنفس طعم اللحم



ياااااه تعبت أوى فى العنوان الطويل ده  ;) 

الفكره كنت قرأتها على النت وبصرحه قلت ناس over اوى .
ولأن التجربه خير دليل قولت أجربها .
وبصراحه أنبهرت وأتصدمت وذُهلت وحاجات كتير كده حصلتلى ... مش ممكن دى نفس طعم اللحمه .. طب جايز لو الولاد داقوها يحسوا بفرق الطعم .

* " يا شبااااااااااااااااب " بنادى على أولادى 
* " تعالوا دوقوا كده " 

* " طعمها مظبوط يا ماما " 
ضحكه شريره نيهاااااا .... الأول  

* " تحفه يا ماما .. هتعمليهالنا سندوتشات دلوقتى "
نيهاهاهاهاهاهاها ضحكه أكثر شراً .. الثانى 

* " أنا عايسها بالكاتسب "
هاهاهاهاها حتى أنت يا بروتس دخلت عليك ... الثالث 

وكان فعلا العشا هو السندوتشات اللى فوق دى .

الحكايه كلها فى شوية كبد وقوانص الفراخ .. نفرمهم فى الكبه .. الكبه مش المفرمه لأن العروق اللى فى القوانص مش هتتفرم فى المفرمه وهتوقفها . ونعصجها عادى زى اللحم المفروم العادى .

 تعصيج اللحم 
بصله مقطعه مكعبات صغيره نشوحها فى ماده دهنيه ( سمن أو زيت ) لحد ما تبقى طريه ..ممكن نضيف لها ثوم .. أنا كمان بحب اقطع معاها فلفل رومى . ونضيف عليها اللحم المفروم ونقلبها كتير لتفكيك اللحم من بعضه وميبقاش فيها اى تكتلات .. كل ده على نار عاليه .. لما لون اللحم يتغير نضيف ملح وفلفل وبهارات ورشة قرفه صغيره . أنا بضيف لها طماطم مبشوره او معلقة صلصة طماطم .. وبس كده 

عبقرية الفكره ان عندى اولادى وباباهم بيحبوا الكبده فكده خليتهم ياكلوا القوانص . لأ وايه مستمتعين بيها هههههههه.

* الكبد والقوانص اللى عندى بتاعت فراخ بلدى .. فمعرفش لو فراخ بيضا هتبقى نفس الطعم ولا لأ ... لزم التنويه علشان لو جربتيها ولقيتى الطعم مختلف ( ده لو اختلف ) فممكن يكون من نوع الفراخ .

* الوصفه كانت من غير صور للخطوات لأنى حسيت انها مش محتاجه .

وبألف هنا 

ليست هناك تعليقات: