دورة المحاشي والاكلات المصرية درس15 الفطير المشلتت

مارس 27, 2014

بسم الله الرحمن الرحيم وبه نستعين
اللهم صلي وسلم علي كامل النور
صباح الخير ياحبيباتي ان شاء الله تكونوا كلكم بخير واسعد حال

الفطير المشلتت :
العجينة : 2ونص كوب دقيق -2ملعقة زيت - 2ملعقة كبار سكر- ملعقة صغيرة ملح -ملعقة صغيرة خميرة (لو فيه فرن فلاحي حامي جدا بيستغني عن الخميرة لانها مش بيتحط خميرة بس لو عملناها في فرن منزلي بتطلع ناشفة علشان كدة حنحط كمية بسيطة من الخميرة بتديها طراوة ) -ماء للعجن بالتقريب حوالي كوب بينحط تدريجي
نعجن كله مع بعض لحد لما نحصل علي عجينة ملساء طرية ومش بتلزق في اليد

نتركها حوالي ربع ساعة تستريح ونقسمها حوالي 8 كرات وممكن اكتر ونحضر طبقين كل واحد فيه حوالي نص كوب سمن والتاني نص كوب زيت ونرش من الاتنين علي الرخامة اللي منظفينها ومنشفينها ونسيبها نص ساعة تستريح والا مش حتتجاوب معانا

نرش من السمن والزيت علي الرخامة ونجيب اول كرة ونبطط باليد ونرش عليها من السمن والزيت ونفرد براحة اليد لحد لما تبق شفافة وننقلها علي جنب برضه علي سطح مرشوش بالدهون

نرش علي وشها ملعقة سمن وده غير اللي بنفرد بيه ولو زيادة في السمن يكون افضل
نمسك الكرة التانية ونفردها بنفس الطريقة ونحطها فوق اللي اتفردت قبل كدةونرش عليها ملعقة سمن والتالتة وهكذا لحد لما نخلص ال8 وطبعا سمن بين كل واحدة

بعد لما خلصنا ال8 ارش سمن واقفل من كل جانبلبعد النصعلشان تبقي الطبقات اكتر
انقلها صينية مدهونة سمن واخلي الناحية اللي فيها الثنايات لتحت واسيبها تستريح مش اقل من نص ساعة وبعدها ابطط لنهاية الصينية واسيبها حوالي ربع ساعة واسخن الفرن علي نار حامية وتحت وفوق واسيبه لحد لما يسخن اوي وادخل الصينية (لو كانت انكمشت تاني وقتها مافيش مانع ابطط تاني ) واتابع سواها ولو كانت واخدة راحتها في الراحة حتديني نتيجة افضل
حنلاحظ انها حتتنفخ في الفرن وتبدا تحمر اخرجها من الفرن واغطيها بصينية 10 دقائق علشان تفضل طرية وساخنة