الخميس، 27 مارس، 2014

طريقه عمل الزلابيه - العوامات


الزلابيه .. او لقمة القاضى .. او العوامات .. أسهل نوع حلويات بالنسبه لى .
المكونات :
2 كوب دقيق 
1/2 كوب نشا .كورن فلاور .
معلقة كبيره خميره + معلقة كبيره سكر .
رشة ملح.
تقريبا 1 كوب ماء دافىء. تختلف كمية الماء حسب نوع الدقيق.
نضع كل المكونات الجافه فى الخلاط ونشغله و نضيف الماء الدافئ شويه بشويه ... لحد ما تتكون معانا عجينه سائله قليلا ( مش خفيفه اوى زى المايه ولا هى تقيله ) . نتركها تختمر .. انا بسيبها فى الخلاط تختمر .. والصوره لشكلها بعد التخمير لمده ربع ساعه .



ممكن تستخدمى معلقه صغيره وتخرجى بيها العجين على الزيت .. بس بتبقى بهدله بالنسبه ليا .. فباخد كيس بلاستيك وادهنه من جوا زيت خفيف وانزل فيه العجينه واربطه كويس.




وعند الطرف اقص الكيس علشان ينزل منه العجين .. كل ما صغرنا الفتحه كل ما كان حجم واحدة الزلابيه اصغر.



نسخن الزيت كويس .. ثم نهدى النار ونعمل وحدات الزلابيه.. نسيب فراغ شويه لأنها بتكبر . نعلى النار ونبدأ نقلب فيها .. لو فى واحده كل ما تقلبيها ترجع تانى ( عادى بتحصل كتير) يبقى تسنديها شويه لحد ما الزيت يتقلها وتتظبط . ونقلبها لحد ما نوصل لدرجة اللون المطلوبه .
* الزلابيه لونها بيفتح شويه بعد ما تخرج من الزيت .. فسبيها تاخد درجه غامقه شويه عن الدهبى .


اللى يخرج من الزيت ينزل مباشرةً على الشربات (الشيره) البارد . يتقلب معاها شويه ثم نخرجه فى مصفاه للتخلص من الشربات الزياده.
* انا بقلى الكميه كلها وبعدين بسقيها بالشربات الدافئ .. لأنى لما بعملها على دفعات مش بلاقى حاجه أقدمها فى الآخر .ههههه مشكله لن تعرفها إلا الأمهات .



طريقة عمل الشربات (الشيره):
2كوب سكر + 1 كوب ماء ..
يغلى كويس ثم نضيف عصير نصف ليمونه ( أو رشة ملح ليمون ).
ونتركهم يغلوا حوالى 5 دقايق كمان .. فى الدقيقه الاخيره نضيف 2 ملعقه كبيره عسل نحل + معلقه صغيره فانيليا .. ممكن استبدال الفانيليا بماء الورد او ماء الزهر .




أنا بحبها بالسكر البودر أكتر من الشربات .


وبألف هنا .

ليست هناك تعليقات: