أسهل طريقة لسلق الكرنب //المحشي//

السلام عليكم ورحمة الله وبركاته

كتير من الاخوات هنا شفتهم بيسالو عن طريقة سلق الكرنب خصوصا المعرق منه واد ايه بيغلبهم
خصوصا الاخوات المقيمة خارج مصر عشان كده قلت باذن الله لازم اعملهم موضوع يسهل عليهم ان شاء الله

بس ياريت المصريات المقيمات داخل مصر ميتريقوش على الكرنب عشان هو هنا بيتباع صغير كده انما في مصر ماشاء الله
الكرنبايه بيكون قطرها من عشرين لخمسة وعشرين ههههههههه ربنا يبارك

وكمان الكرنب اللى مش معرق هنا يعتبر معرق بالنسبة لمصر فلو سمحتو راعو النقطة دى هههههه

اول حاجه نجيب الركنبايه ونحدد راسها بالشكل ده

بعد كده ندخل السكينة ونقطعها وهى سهلة خالص دخلى السكينة في كل طرف واقطعى في الاخر هتطلع معاكى الراس كلها وتكون بالشكل ده

بعد كده نكون غلينا مية على النار ونحط فيها ملح وكمون وكمون عشان الكرنب بيعمل انتفاخات احيانا والكمون ان شاء الله هيضيعها ويون بالشكل ده

بعد كده دى اهم حته صراحة هتيجي الكرنبايه وتوقفيها بالطول عشان المية المغلية تدخل في التجويف اللى احنا عملناه وبتكون شكلها كده

بعدين بقه زي الشطوره تقلبيها على وشها لما التحويف ياخد مية مغلية ويتكون كده

بعد كده توطى النار شوية ولو معرقة هتقعد وقت اطول لو مش معرقة تاخدى بالك وبعد شوية تمسكى حته من الكرنبايه من اللى هى في المية اوعى تتلسعى ههههه وتقطعيها لو اتقطعت بصعوبة شوية لكن اتقطعت يبقى كده تمام اقلبيها الناحية التانية كده

بعد كده طبعا الجزء اللى تحت بديهي جدا بيكون ارق من اللى فوق فمش هياخد وقت طويل  بعد كده تبداى بقه بملعقة كبيرة تاخدى ورقة ورقة
بداية من فوق واحدة واحدة وتطلعى الورقة بالطريقة دى عشان قفضل بحالتها ومتتقطعش

بعد كده وانتى بتطلعى هتلاقي نفسك شلتى شوية ورق بس في ورق حسيتى انه لسه مش اتسلق بتستنى شوية بعد كده تبداى تشيلي تانى لحد ما الكرنبايه

تخلص وتكون بالشكل ده بتطلعيها في مصفة عشان تنزل المية اللى فيها وتكون دافيه وانتى بتقطعيها

بعد كده يا حلوين نيجي للنقطة الحلوة الى هى تقطيع الكرنب هتيجي ورقة الكرنب وتقفليها نصين تلقائيا هتلاقي العرق فوق عامل زى القوس

هتبداى من تحت بالسكينة وتطلع لاخر العرق لحد ما تفصليه عن الورقة خالص كده

بعد كده والورقة مقفولة نصين كده لفيها رول بايدك وهى سهلة جدا والله حسب ما انتى بتحبي لو بتحبي صابع المحشي كبير اقطعيه الرول حسب ما تحبي انا احبه صغير فعشان كده قطعته كده

بعد كده هتكون خلصتى كل الورق تقطيعه من العروق هتمسكي كل ورقة وتفرديها وتقطعيها برضه حسب مزاجك الافضل والاحسن يكون طول الورقة وانتى بتقطعيها من اربعة سم الى ستة سم عشان لما صابع المحشي وهو بيستوي ويغلى ميخرجش من الرز ويكون ملفوف كووويس

وانا كده قطعت المحشي  وحشيته اكيد طبعا شفتو موضوع ماريا الحبوبة بتاع المحشي اعملو الخطلة زيها بالظبط انا بعملها زيها

وكمان اسقو المحشي زيها بالظبط ومش هتندمو ان شاء الله

وفي الاخير دا طبق المحشي ومعاها متطلباته هتلاقو في الصينية طبق رز احمر الطبق ده لما بيتبقى خلطة من بتاع المحشي بسويه في حلة جانبيه

واغرفه مع الاكل بيكون طعمه خطير

صور مصغرة مرفقة

  • 230420121202.jpg
  • 230420121203.jpg
  • 230420121204.jpg
  • 230420121205.jpg
  • 230420121206.jpg
  • 230420121207.jpg
  • 230420121208.jpg
  • 230420121209.jpg
  • 230420121211.jpg
هذه بقية الصور يا اخوات

صور مصغرة مرفقة

  • 230420121212.jpg
  • 230420121213.jpg
  • 230420121214.jpg
  • 230420121217.jpg
  • 230420121218.jpg
  • 230420121220.jpg
  • 230420121221.jpg

تعليقات

المشاركات الشائعة من هذه المدونة

اللحمه البارده او الرستو لعزومات رمضان

صينية الشاورما هتدوبي في طعمها

طريقة عمل لحم مفروم كذاب ( بدون لحم ) بنفس طعم اللحم