حفلـــــه مشاوى مشكله معاها الرز المدخن بطريقه تقديم شيك تشرفك قدام ضيووفك
وده الرز المدخن
تتبيله الفراخ
اولا انا بحب اخلى الفراخ فى الشوى بتبقى اشيك فى التقديم وكمان اسهل فى الاكل
ميه بصل +ملح وفلفل+بهارات شوى ودى بتتجاب من عند العطار+معلقتين خل +طماطمايه صغيره مبشوره ناعم +فص توم صغير مفروم ناعم اووى+بهارات فراخ
وتسيبيها فى التتبيله حوالى 7ساعات او تعمليها من بليل بتبقى الذ واطعم
تتبيله الشيش كباب
ميه بصل +طماطم مبشوره +2م ك خل +فص توم صغير +ملح وفلفل +بهارت شوى واحطها ع اللحمه من بليل عشان تتبل كويس
وانا فى المشويات مبحبش افتكس فى التوابل عشان مضيعش نكهه الطعم المشوى الاصليه
تتبيله الكفته
لحمه مفرومه
دهن ضانى (مهم جدا لان ده اللى هيديكى النكهه الحلوه
بصله مبشوره ناعم اووى
1 فلفل حار او بارد
بقدونس(اقل من تلت الحزمه او ع حسب كميه اللحمه بتاعتك
وفى الكبه بفرم البصل والفلفل والبقدونس وملح وفلفل وبهارات شوى(من عند العطار ) +الدهن الضانى وبفرمهم كلهم ناعم اووى وبعدين بخلطهم ع اللحمه وبضرب اللحمه بالمكونات فى الكبه واسيبها فى التلاجه لغايه مابتدى اجهزها وشويها
هنا الفراخ وهى بتتشوى ياووهوى ع الريحه ماشاء الله بجد فظيعه
وتفضلى تقلبى الفراخ كل شويه عشان متتحرق من جانب ومتستويش قلبى فيها عشان تستوى من كل الجوانب
ودى الكفته بعد ماصبعناها ع الاسياخ وبفضل اقلب فيها لغايه ماتربط شويه عشان متفكش منك ومبسبهاش تتحمر اووى عشان متنشفش هى كده كده اللحمه بتستوى بسرعه
ملحوظه
لما تيجى تعملى دور تانى من الكفته بقطعه قماشه نضيفه وتبليها ميه وتمسحى بيها ع السيخ السخن عشان يبرد وتعرفى تصبعى عليه الكفته
بالنسبه للشيش كباب بقا انا نسيت اصوره تقريبا كان مكسوف يتصور
صوره مجمعه للمشاوى (فراخ- كفته-شيش كباب)
صوره اخرى لزوم الشىء
نيجى بقا للرز المدخن
هنجيب قطعه زبده وشويه زيت وورق لورا وحبهان ونحطهم فى حله وننزل بالرز عليهم ونديها تشوحيتين كده وبعدين نزوده ميه سخنه (مش شوربه) عشان احنا مش عايزينه رز عادى احنا عايزين رز بنكهه جديده
وبضيف ملح وفلفل ورشه صغيره كمون واسيبها تستوى وبعد مايستوى بجمر فحمه وفى ورقه فويل واحها فى حله الرز وعليها قطعه زبده صغيره واغطى الحله بسررررعه عشان الرز ياخد ريحه دخان الفحم كله
طريقه تقديم الرز المدخن
بجيب بوله واحط فيها قطع صغيره من صدور الفراخ المشويه مخلوطه بشويه بقدونس وبعدين احط طبقه رز واكبس بالمعلقه كويس وبعدين طبقه فراخ بالبقدونس وفى الاخر اغطيها بطبقه رز واقلب البوله على طبق مسطح وبالف هنا
ده ينفع طبق جانبى فى العزومات بجد ماشاء الله رهيب
تعليقات