اعملي الفينو في بيتك و وفري

بسم الله الرحمن الرحيم
اللهم اني ااصبحت اشهدك واشهد حملة عرشك وملائكتك وجميع خلقك انك انت الله لا اله الا انت وحدك لاشريك لك وان محمدا عبدك ورسولك
صباح الخير علي احلي بنات

الفينو -الصامول:

للعجينة:3كوب كبير دقيق-ملعقةسكر-ملعقةكبيرة خميرة -فنجان صغير قهوة-ملعقةحليب بودرة-2ملعقة كبيرة زبادي-ملعقةصغيرةممسوحة ملح-ماء للعجن -ملعقة سمن
الطريقة:
نحط الدقيق في العجانة مع اضافة كل المكونات ماعدا المية والملح ونقلبهم شوية ثم نضيف الملح والمية تدريجي لحد لما نحصل علي عجينة طرية ومش بتلزق
انا بحط بالتقريب حوالي كوب اللا ربع مية
نفضل نضرب في العجانة حوالي 7 دقايق ولو علي اليد نزود الوقت وممكن اللي ماعندهاش عجانة اضرب في الفود بروسيسور وبعد كدة الم العجينة بالسمن واسيبها علي سطح مرشوش دقيق خفيف



المرحلة التانية احط العجينة علي رخامة نضيفة واطبق من اليمين للشمال ومن تحت لفوق لمدة دقيقتين ولو ذودنا يكون افضل



اسيبها نص ساعةاو اكتر حسب الجو لحد لما يبدا حجمها يتضاعف اقطعها اجزاء متساوية والف كل جزء ابرمه واسيبه علي الرخامة لحد لما اخلص الكمية



احضر صينية الفرن اما افرشها لوح سيليكون او ارشها دقيق خفيف
امسك كل قطعة عجين وابططها تاني والفها زي السويسرول واقفل الحرف كويس وادحرجها علي الرخام لتسوية المنظر واحط في صينية الفرن علي مسافات بس اراعي ان قفل الحرفين يكون من تحت يعني ملامس للصينية علشان ماتفتحش او اقفل كورة وادحرج علي الرخامة علشان تبقي كايزر



اسيبها تخمر ولما يبدا الحجم يتضاعف بنسبة قليلة ادهن الوش حليب ولو عايزة ارش سمسم ارش بعد الحليب سمسم او حبة البركة او اسيبه سادة حسب الرغبة



اسيبه يكمل الاختمار لحد لما الحجم يتضاعف ولما اهز الصينية يتهز العجين يعني مش احس انه ثابت اسخن الفرن علي درجة عالية لمدة 10 دقايق وابدا في التسوية بس مش اغيب عنه لانه بياخد في الفرن الكهربا حوالي 4 دقايق
اسيبكم مع الصور



وهنا تشكيلة بعد خروجه من الفرن



بالسمسم



سادة



بالسمسم وحبة البركة


 
 وهنا من جوة شوفوا هش ازاي



مع الشاي ولو اني بحبه في كوباية



وبالف صحة وعافية حيبقي ادمان بعد كدة احسن وانضف من الجاهز
ملحوظة:ماتحاوليش تشيليه من الصينية وهو ساخن واللا حتلاقيه لازق وحيتقطع منك وانتي بتشيليه
استني عليه يهدا وشيليه بمقصوصة المكرونة البشاميل

تعليقات

المشاركات الشائعة من هذه المدونة

اللحمه البارده او الرستو لعزومات رمضان

صينية الشاورما هتدوبي في طعمها

طريقة عمل لحم مفروم كذاب ( بدون لحم ) بنفس طعم اللحم